မြန်မာနိုင်ငံတော် ဗဟိုဘဏ်သည် ဟောင်းနွမ်းငွေစက္ကူများအစား အသစ်များ ပြန်လည်လဲလှယ်ပေးရန် စီစဉ်လျက်ရှိကြောင်း သိရသည်။ ဗဟိုဘဏ်၏ အစီအစဉ်အရ သတ်မှတ်ချက်နှင့် ပြည့်စုံသော ငွေစက္ကူအဟောင်းများကို အသစ်များနှင့် လဲလှယ်ပေးရန် ပြင်ဆင်ထားသည်။ ယခုအစီအစဉ်အရ (၁၀)ကျပ်တန်မှ (၂၀၀)တန် ငွေစက္ကူများကို ရန်ကုန်မြို့ အမှတ်(၁၉၈/၁၉၉)၊ ဗိုလ်ဆွန်ပက်လမ်းနှင့် ကမ်းနားလမ်းထောင့်ရှိ မြန်မာနိုင်ငံတော် ဗဟိုဘဏ် လုပ်ငန်းဌာနခွဲ ငွေစက္ကူလဲလှယ်ရေးကောင်တာနှင့် မြန်မာ့စီးပွားရေးဘဏ် ဘဏ်ခွဲအသီးသီးတွင် သြဂုတ်လ(၃)ရက်နေ့မှ စတင်ကာ လဲလှယ်ပေးသွားမည် ဖြစ်သည်။
ထို့အပြင် ဗဟိုဘဏ်သည် ငွေစက္ကူအသစ်များ ပြန်လည်လဲလှယ်ပေးမည့် စီမံကိန်းကို နေပြည်တော်၊ ရန်ကုန်နှင့် မန္တလေးတို့ရှိ စည်ပင်သာယာရေး ကော်မတီများရှိ ဈေးဌာနများနှင့် မြို့တွင်းပြေးဆွဲနေသော ဘတ်စ်ကားများအတွက်ပါ စီစဉ်သွားမည်ဖြစ်သည်။ မြန်မာနိုင်ငံအတွင်း လည်ပတ်သုံးစွဲနေသော ငွေစက္ကူ အချို့တို့သည် အလွန်ဟောင်းနွမ်းနေပြီး သုံးစွဲရန် မသင့်တော်တော့ကြောင်း ဝေဖန်မှုအချို့ ရှိနေသဖြင့် ယခုစီမံကိန်းကို ပြည်သူအများက လက်ခံကြိုဆိုကြဖွယ် ရှိနေသည်။ ထိုငွေစက္ကူအစုတ်များကို အများဆုံး တွေ့ရသည့် နေရာများမှာ ဘတ်စ်ကားများနှင့် သားငါး၊ ဟင်းသီးဟင်းရွက် ရောင်းချသည့် ဈေးများတွင်ဖြစ်ကြောင်းလည်း သတင်းရရှိသည်။
No comments:
Post a Comment